Magistratura

“Zamonaviy nemis adabiyotining asosiy yo‘nalishlari” kursi XX asrning ikkinchi yarmidan boshlab hozirgi davrgacha bo‘lgan nemis tilida yaratilgan adabiy jarayonlarni tahlil qilishga bag‘ishlanadi. Kurs doirasida zamonaviy nemis adabiyotining estetik, falsafiy va ijtimoiy asoslari, yetakchi adabiy yo‘nalishlari hamda muhim adiblar ijodi o‘rganiladi.

Mazkur kursda Urushdan keyingi adabiyot, Trümmerliteratur, Ekzistensializm, Yangi realizm, Postmodernizm, Migratsion adabiyot, Gender va identitet muammolari, shuningdek, XXI asr nemis adabiyotidagi yangi tendensiyalar kabi yo‘nalishlarga alohida e’tibor qaratiladi. Adabiyotning jamiyat, tarix va shaxs bilan o‘zaro munosabati badiiy matnlar asosida tahlil qilinadi.

Kurs jarayonida talabalar zamonaviy nemis adabiyotining asosiy tushunchalari bilan tanishadi, adabiy matnlarni mustaqil tahlil qilish, tanqidiy fikrlash va ilmiy mulohaza yuritish ko‘nikmalarini rivojlantiradilar. Mashg‘ulotlar ma’ruza, seminar, matn tahlili, taqdimot va muhokamalar shaklida olib boriladi.

Ushbu kurs talabalarga zamonaviy nemis adabiyotining global madaniy jarayondagi o‘rni va ahamiyatini chuqur anglash, shuningdek, nemis tilidagi badiiy matnlarni professional darajada tushunish va talqin qilish imkonini beradi.